- ਮਿਰੋਸਲਾਵ ਕਲੋਸ ਦੇ 16 ਗੋਲਾਂ ਦੇ ਵਿਸ਼ਵ ਕੱਪ ਰਿਕਾਰਡ ਦੀ ਕੀਤੀ ਬਰਾਬਰੀ
ਸਪੋਰਟਸ ਡੈਸਕ : ਅਰਜਨਟੀਨਾ ਦੇ ਕਪਤਾਨ ਲਿਓਨਲ ਮੈਸੀ ਨੇ ਫੀਫਾ ਵਿਸ਼ਵ ਕੱਪ 2026 ਵਿੱਚ ਸ਼ਾਨਦਾਰ ਪ੍ਰਦਰਸ਼ਨ ਕਰਦਿਆਂ ਅਲਜੀਰੀਆ ਖ਼ਿਲਾਫ਼ ਆਪਣੇ ਵਿਸ਼ਵ ਕੱਪ ਕਰੀਅਰ ਦੀ ਪਹਿਲੀ ਹੈਟ੍ਰਿਕ ਜੜੀ। ਮੈਸੀ ਦੇ ਤਿੰਨ ਗੋਲਾਂ ਦੀ ਬਦੌਲਤ ਮੌਜੂਦਾ ਚੈਂਪੀਅਨ ਅਰਜਨਟੀਨਾ ਨੇ ਗਰੁੱਪ ਜੇ ਦੇ ਮੈਚ ਵਿੱਚ ਅਲਜੀਰੀਆ ਨੂੰ 3-0 ਨਾਲ ਹਰਾ ਕੇ ਟੂਰਨਾਮੈਂਟ ਵਿੱਚ ਜੇਤੂ ਸ਼ੁਰੂਆਤ ਕੀਤੀ।
ਮੈਸੀ ਨੇ ਪਹਿਲੇ ਅੱਧ ਵਿੱਚ ਗੋਲ ਕਰਕੇ ਅਰਜਨਟੀਨਾ ਨੂੰ ਬੜ੍ਹਤ ਦਿਵਾਈ। ਇਸ ਤੋਂ ਬਾਅਦ ਦੂਜੇ ਅੱਧ ਵਿੱਚ ਉਸ ਨੇ ਦੋ ਹੋਰ ਗੋਲ ਕਰਕੇ ਮੈਚ ਨੂੰ ਪੂਰੀ ਤਰ੍ਹਾਂ ਇੱਕ-ਪਾਸੜ ਬਣਾ ਦਿੱਤਾ। ਅਲਜੀਰੀਆ ਦੀ ਟੀਮ ਮੈਸੀ ਦੀ ਅਗਵਾਈ ਵਾਲੇ ਹਮਲੇ ਦਾ ਕੋਈ ਜਵਾਬ ਨਹੀਂ ਦੇ ਸਕੀ ਅਤੇ ਪੂਰੇ ਮੈਚ ਦੌਰਾਨ ਦਬਾਅ ਹੇਠ ਰਹੀ।
ਇਸ ਹੈਟ੍ਰਿਕ ਨਾਲ 39 ਸਾਲਾ ਮੈਸੀ ਨੇ ਇੱਕ ਹੋਰ ਇਤਿਹਾਸਕ ਉਪਲਬਧੀ ਆਪਣੇ ਨਾਂ ਕਰ ਲਈ। ਵਿਸ਼ਵ ਕੱਪ 2026 ਦੀ ਸ਼ੁਰੂਆਤ ਤੋਂ ਪਹਿਲਾਂ ਉਸ ਦੇ ਨਾਮ 13 ਗੋਲ ਦਰਜ ਸਨ। ਅਲਜੀਰੀਆ ਵਿਰੁੱਧ ਤਿੰਨ ਗੋਲਾਂ ਨਾਲ ਉਸ ਦੀ ਕੁੱਲ ਗਿਣਤੀ 16 ਹੋ ਗਈ, ਜਿਸ ਨਾਲ ਉਸ ਨੇ ਜਰਮਨੀ ਦੇ ਮਹਾਨ ਸਟਰਾਈਕਰ ਮਿਰੋਸਲਾਵ ਕਲੋਸ ਦੇ ਵਿਸ਼ਵ ਕੱਪ ਵਿੱਚ ਸਭ ਤੋਂ ਵੱਧ 16 ਗੋਲਾਂ ਦੇ ਰਿਕਾਰਡ ਦੀ ਬਰਾਬਰੀ ਕਰ ਲਈ।
ਮੈਸੀ ਹੁਣ ਟੂਰਨਾਮੈਂਟ ਦੇ ਬਾਕੀ ਮੈਚਾਂ ਵਿੱਚ ਇਹ ਰਿਕਾਰਡ ਤੋੜਨ ਤੋਂ ਸਿਰਫ਼ ਇੱਕ ਗੋਲ ਦੂਰ ਹੈ। ਖੇਡ ਮਾਹਿਰਾਂ ਦਾ ਮੰਨਣਾ ਹੈ ਕਿ ਮੌਜੂਦਾ ਫਾਰਮ ਨੂੰ ਦੇਖਦੇ ਹੋਏ ਉਹ ਜਲਦ ਹੀ ਵਿਸ਼ਵ ਕੱਪ ਇਤਿਹਾਸ ਦਾ ਸਭ ਤੋਂ ਵੱਧ ਗੋਲ ਕਰਨ ਵਾਲਾ ਖਿਡਾਰੀ ਬਣ ਸਕਦਾ ਹੈ।
ਇਸ ਦੇ ਨਾਲ ਹੀ ਮੈਸੀ ਨੇ ਇੱਕ ਹੋਰ ਵਿਲੱਖਣ ਉਪਲਬਧੀ ਹਾਸਲ ਕੀਤੀ। ਉਹ ਕ੍ਰਿਸਟੀਆਨੋ ਰੋਨਾਲਡੋ ਤੋਂ ਬਾਅਦ ਵਿਸ਼ਵ ਕੱਪ ਦੇ ਪੰਜ ਵੱਖ-ਵੱਖ ਐਡੀਸ਼ਨਾਂ ਵਿੱਚ ਗੋਲ ਕਰਨ ਵਾਲਾ ਦੁਨੀਆ ਦਾ ਸਿਰਫ਼ ਦੂਜਾ ਫੁੱਟਬਾਲਰ ਬਣ ਗਿਆ ਹੈ।
ਮੈਸੀ ਦੀ ਅਗਵਾਈ ਵਿੱਚ ਅਰਜਨਟੀਨਾ ਨੇ ਆਪਣੇ ਖ਼ਿਤਾਬ ਬਚਾਅ ਅਭਿਆਨ ਦੀ ਮਜ਼ਬੂਤ ਸ਼ੁਰੂਆਤ ਕੀਤੀ ਹੈ। ਟੀਮ ਅਤੇ ਪ੍ਰਸ਼ੰਸਕਾਂ ਨੂੰ ਉਮੀਦ ਹੈ ਕਿ ਮਹਾਨ ਫਾਰਵਰਡ ਦੇ ਤਜਰਬੇ ਅਤੇ ਫਾਰਮ ਦੀ ਬਦੌਲਤ ਅਰਜਨਟੀਨਾ ਇੱਕ ਵਾਰ ਫਿਰ ਵਿਸ਼ਵ ਕੱਪ ਟਰਾਫੀ ਜਿੱਤਣ ਦੀ ਦੌੜ ਵਿੱਚ ਮਜ਼ਬੂਤੀ ਨਾਲ ਬਣੀ ਰਹੇਗੀ।